"Al definirte como gallego, no me representas como español"
Antón Reixa salva a súa primeira batalla na SGAE con duras
críticas do sector de Fernández Sastrón. O artista galego recibiu apupos
e aplausos nunha tensa asemblea.
Seis horas. Ese foi o tempo que durou unha das
asembleas máis tensas dos últimos tempos da SGAE e que acabou
referendando, na noite deste xoves, as contas deste organismo nunha
bronca tensión na que o seu presidente, o artista vigués Antón Reixa,
recibiu númerosas críticas á súa xestión, pero tamén foi ovacionado
polos seus partidarios.
Os momentos de maior tensión vivíronse durante a intervención do
cantante e compositor Juan Erasmo Mochi que reprochou a Reixa que se
defina como galego e dixo que non lle representaba como español, momento
no que algún socio lle chamou "fascista".
Tamén caldeou o ánimo a intervención do presidente da Asociación de
Compositores e Autores de Música (ACAM), José de Eusebio, que criticou
duramente ao presidente da SGAE, do mesmo xeito que fixo Fernández
Sastrón. Todos eles son do grupo crítico a Reixa.
Pero o artista galego defendeuse, e foi ovacionado cando insistiu en
loitar contra o que cualificou de "fraude" por parte dun grupo de
socios.
Finalmente, Reixa conseguiu 10.994 votos a favor (56,13 por cento)
fronte a 8.374 en contra (un 42,95 por cento) e 384 abstencións (0,92
por cento). Uns resultados que salvaron, de momento, a xestión de Reixa a
fronte deste organismo cunhas contas que el mesmo cualificou de
"impecables desde o punto de vista técnico, económico e contable". Non
pensa o mesmo o seu rival nas últimas eleccións, Luís Miguel Fernández
Sastrón, que denunciou que o balance económico é "ilegal".
Investigacións
Precisamente, contra el e outros once socios que están sendo
investigados, foron as críticas máis duras de Reixa que denunciou que,
mediante unha "fraude", conseguiron da entidade 25 millóns de euros no
últimos cinco anos.
"Isto é unha sociedade de autores, non de intermediarios e produtores
e con estas prácticas se está a xogar o futuro da SGAE", indicou. "Non
son autores, limitáronse a cambiar unha nota e nos títulos dunha mesma
canción dunha obra de dominio público",engadiu.
A investigación realízase en relación á repartición dos dereitos
televisivos entre produtores intermediarios que, ao parecer, falsean
autorías de pezas musicais de dominio público cambiando unha soa nota ou
rexistrándose como coautores en espazos de televisión en horario de
madrugada.
O presidente da entidade atribuíu a este asunto a alta asistencia á
asemblea xeral celebrada este xoves e á polémica que suscitou a carta
que enviou en marzo aos socios advertíndolles destas prácticas, misiva
que levantou "bochas" nalgúns socios que aproveitaron para reprocharlle
que non pedise permiso á Xunta directiva para falar diso nos medios de
comunicación.
"Impresentable"
Dous dos socios contra os que se abriron dilixencias de investigación
interviñeron tamén na asemblea, e mostráronse moi doídos pola forma na
que se levou a cabo. Entre eles, Juan Felipe López Márquez, que dixo
que as contas eran "moi malas" e a xestión de Reixa "impresentable".
Con todo, Reixa defendeu os seus números e unha entidade, que a 31 de
maio de 2013, incrementou os seus ingresos nun 3,8 por cento respecto
ao mesmo período do ano anterior, segundo un avance das previsións
orzamentarias exposto ante a asemblea polo director económico
financeiro, Luís Felipe Palacios.
Sen embargo, e segundo as contas aprobadas, a SGAE rexistrou en 2012
unhas perdas de 1,8 millóns de euros nun ano "especialmente difícil",
caracterizado por "unha caída brutal" da demanda cultural, a pesar do
cal os seus socios cobraron en concepto de dereitos de autor 384 millóns
de euros.
No hay comentarios:
Publicar un comentario